私隱政策

1. 我哋收集嘅資料

1.1 帳號資料

• 電郵地址同顯示名稱；如果你設定密碼，我哋只會儲存 bcrypt 雜湊。
• 短期登入工作階段、經雜湊嘅更新令牌及驗證碼，用嚟驗證身份同防止濫用。
• 用 Apple 或 Google 登入時，由該平台提供嘅基本資料（例如電郵）。我哋唔會收到你嘅密碼。

1.2 你喺 App 建立嘅內容

• 行程：目的地、日子、同行類型、偏好、每日安排，同埋為行程生成嘅封面、插畫或漫畫。
• AI 對話：你同 AI 嘅訊息。
• 收藏、意見回饋，同你主動上載嘅相片（例如旅程相簿及意見回饋截圖）。

1.3 翻譯同相機

你用文字翻譯或者相機翻譯時，文字或相片會傳送去 AI 服務供應商處理，結果即時返回畀你。我哋唔會儲存你嘅相機相片或翻譯內容，只會記錄用量（例如次數同 AI 用咗幾多 token）作計算積分同成本之用。

1.4 語音

對話翻譯嘅語音辨識同朗讀，係用你手機系統（Apple／Google）喺裝置上提供嘅功能。我哋唔會收到或者儲存你嘅錄音。舊版嘅「聲線複製」功能已經取消，相關語音片段會被刪除。

1.5 積分同購買

我哋會記錄積分交易同 Trip Pass 購買（產品、時間、有效期）。付款由 Apple 或 Google 處理，購買資料經 RevenueCat 通知我哋；我哋唔會收到你嘅信用卡或付款資料。

1.6 使用分析同錯誤報告

• PostHog：以你嘅用戶 ID 記錄你用咗邊啲功能（例如「建立行程」「相機翻譯」），幫我哋改善產品。唔包括電郵。
• Sentry：App 崩潰或出錯時嘅技術資料，例如裝置型號、系統版本、App 版本同錯誤內容。
• 伺服器日誌會短暫處理 IP 位址，用嚟保安同防止濫用。

1.7 推送通知

如果你允許通知，我哋會儲存你部機嘅推送令牌，用嚟寄行程提醒同系統通知。你可以隨時喺手機設定關閉。

1.8 相機、相簿同位置權限

• 相機同相簿：只喺你用相機翻譯或者揀相時使用。
• 位置：部分版本喺你授權後，會喺手機上用你嘅位置顯示附近地區名稱（由手機系統處理）。我哋嘅伺服器唔會收到或儲存你嘅位置。

1.9 電郵（Gmail）

「Gmail 匯入訂單」功能已經停用，我哋唔會存取你嘅電郵內容。

2. 我哋點樣使用資料

• 提供 App 功能：砌行程、分享行程、AI 對話、翻譯、相機翻譯、季節提示同行程提醒。
• 管理帳號、積分同 Trip Pass。
• 處理你嘅查詢同意見回饋。
• 監察服務質素、排查錯誤、防止濫用同保障安全。
• 了解邊啲功能有用，改善產品。

我哋冇廣告，亦唔會用你嘅資料做跨 App 追蹤。

3. AI 處理

AI 功能會將你輸入嘅內容（例如行程要求、對話訊息、要翻譯嘅文字或相片）傳送去 AI 服務供應商處理。我哋唔會主動將你嘅姓名或電郵傳送畀 AI 供應商。請唔好喺 AI 對話輸入敏感資料，例如身份證號碼、信用卡或密碼。

AI 生成嘅內容可能有錯。行程、季節日子、翻譯同插畫只供參考，出發前請自行核實。

4. 服務供應商

我哋只會喺提供服務需要嘅範圍內，同以下供應商分享資料：

Google 地圖同訂購連結：行程入面嘅「地圖」會喺 Google 地圖打開；「訂酒店」「訂票」等連結會帶你去第三方網站（例如 Booking.com、Klook）。我哋唔會將你嘅資料傳送畀佢哋，但你撳入去之後，就會受嗰個網站嘅私隱政策約束。部分連結係推廣連結，對方可能知道你係由BackJap過去。

以上供應商可能喺香港以外（例如美國）處理資料。我哋會揀有合理保安措施嘅供應商，並只提供所需資料。

5. 分享行程

你分享行程時，任何有條連結嘅人都睇到行程標題、日子、目的地同每日安排（唔包括你嘅姓名、電郵或私人備註）。刪除行程之後，分享連結就會失效。

6. 資料保留

旅程相片會加密儲存。加入行程嘅朋友可以共同編輯行程及查看旅程相片。你主動分享嘅相片播放頁使用長隨機連結；持有連結嘅人可以瀏覽，擁有人可以撤銷分享。只有你選擇用相片生成漫畫時，相片先會傳送去圖片 AI 供應商。

• 行程同 AI 對話：保留到你自己刪除，或者刪除帳號為止。
• 相機翻譯相片同翻譯內容：唔會儲存；你主動加入旅程相簿嘅相片會保留到刪除。
• 登入工作階段最多 30 日；過期驗證紀錄會喺過期一日後的每日清理工作刪除。
• 錯誤報告同使用分析：按 Sentry 同 PostHog 嘅標準期限保留。
• 積分同購買記錄：刪除帳號後會以去識別形式保留，以符合會計同稅務要求（一般最長 7 年）。

7. 刪除帳號

你可以喺 App「更多 → 設定 → 刪除帳號」刪除帳號，或者電郵要求我哋處理（步驟見刪除帳號）。刪除帳號會：

• 刪除你嘅登入帳號及所有登入工作階段；
• 刪除你嘅行程、AI 對話、收藏、通知同推送令牌，以及上載相片同行程插畫嘅記錄；
• 將你嘅個人檔案匿名化（移除電郵、名稱等可識別資料）；
• 保留去識別嘅積分同購買記錄作會計用途。

8. App 追蹤透明度（iOS）

iOS 可能會問你係咪容許追蹤。無論你點揀，我哋都唔會同廣告商分享你嘅資料，App 功能亦唔受影響。

9. 你嘅權利

根據香港《個人資料（私隱）條例》，你有權：

• 查閱同改正我哋持有嘅你嘅個人資料；
• 要求刪除帳號同相關資料；
• 隨時喺手機設定關閉相機、位置同通知權限。

如要提出查閱或改正要求，請電郵 support@backjap.com。

10. 保安

所有連線都經 HTTPS 加密；伺服器同資料庫設有存取控制；登入令牌用 iOS Keychain／Android Keystore 安全儲存喺你部機。任何系統都唔可以保證百分百安全，如發生影響你嘅資料外洩，我哋會按法例通知你。

11. 兒童

本 App 唔係為 13 歲以下兒童而設，我哋唔會刻意收集兒童嘅個人資料。如發現收集咗，我哋會盡快刪除。

12. 政策更新

我哋可能會更新呢份政策。更新後會喺呢頁公布並更改「最後更新」日期；重大改動會喺 App 內通知你。

13. 聯絡我哋

Novelist Labs · support@backjap.com